:

ವರದಿಗಾರರು : ಮೀನಾಕ್ಷಿ ರಮೇಶ್ ರಾಠೋಡ್ || ಸ್ಥಳ : ಬೆಂಗಳೂರು
ವರದಿ ದಿನಾಂಕ : 10-03-2025

ಇಸ್ರೋದಿಂದ ಮತ್ತೊಂದು ಸಾಧನೆ: ಭೂಮಿಯನ್ನು ಸಾವಿರ ಪ್ರದಕ್ಷಿಣೆ ಹಾಕಿದ POEM-4 !

ಬಾಹ್ಯಾಕಾಶ ಡಾಕಿಂಗ್ ಪ್ರಾಯೋಗಿಕ ಕಾರ್ಯಾಚರಣೆಗಾಗಿ ಬಳಸಲಾದ PSLV ವಾಹನದ ಮರು ಬಳಕೆ ಮಾಡಲಾದ ಸ್ಪೆಂಟ್ ಅಪ್ಪರ್​ ಸ್ಟೇಜ್​ PSLV ಆರ್ಬಿಟಲ್ ಪ್ಲಾಟ್‌ಫಾರ್ಮ್ ಎಕ್ಸ್‌ಪರಿಮೆಂಟ್ ಮಾಡ್ಯೂಲ್ (POEM-4) ನ ನಾಲ್ಕನೇ ಆವೃತ್ತಿಯು ಮಾರ್ಚ್ 4 ರಂದು ಸಾವಿರ ಕಕ್ಷೆಗಳನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದೆ ಎಂದು ಇಸ್ರೋ ಶುಕ್ರವಾರ ಘೋಷಿಸಿದೆ.

PSLV-C60 ಮಿಷನ್ ಡಿಸೆಂಬರ್ 30, 2024 ರಂದು ಉಡಾವಣೆ ಮಾಡಲಾಯಿತು ಮತ್ತು SPADEX ಬಾಹ್ಯಾಕಾಶ ನೌಕೆಯ ಯಶಸ್ವಿ ಆಲಿಂಗನ ಅಥವಾ ಡಾಕಿಂಗ್​ ನಂತರ POEM-4 ತನ್ನ ಕಾರ್ಯಾಚರಣೆ ಪ್ರಾರಂಭಿಸಿತು ಎಂದು ಇಸ್ರೋ ಹೇಳಿದೆ.

POEM-4 ಅನ್ನು 24 ಉಪಕರಣಗಳನ್ನು ಹೊತ್ತ ಮೂರು - ಅಕ್ಷಗಳ ಸ್ಥಿರ ವೇದಿಕೆಯಾಗಿ ವಿನ್ಯಾಸಗೊಳಿಸಲಾಗಿದೆ ಎಂದು ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ISRO) ಹೇಳಿಕೆಯಲ್ಲಿ ತಿಳಿಸಿದೆ. ಇದರಲ್ಲಿ ಸರ್ಕಾರೇತರ ಸಂಸ್ಥೆಗಳಿಂದ (NGEs) 10 ಉಪಕರಣಗಳು ಮತ್ತು ಇಸ್ರೋದಿಂದ 14 ಉಪಕರಣಗಳು ಸೇರಿವೆ. NGE ಸೇರಿದಂತೆ ಎಲ್ಲ ಉಪಕರಣಗಳು ಕಕ್ಷೆಯಲ್ಲಿ ತಮ್ಮ ಉದ್ದೇಶಿತ ಪ್ರಯೋಗಗಳನ್ನು ಪೂರ್ಣಗೊಳಿಸಿವೆ.

POEM-4 ಇಲ್ಲಿಯವರೆಗಿನ ಎಲ್ಲ POEM ಕಾರ್ಯಾಚರಣೆಗಳಲ್ಲಿ ಅತಿ ಹೆಚ್ಚು ಸಂಖ್ಯೆಯ ಉಪಕರಣಗಳನ್ನು ಹೊತ್ತೊಯ್ದಿದ್ದು, ವಿವಿಧ ರೀತಿಯ ಉಪಕರಣಗಳಿಗೆ ಕೈಗೆಟುಕುವ ಪ್ರಾಯೋಗಿಕ ವೇದಿಕೆಯಾಗಿ ಅದರ ಸಾಮರ್ಥ್ಯ ದೃಢಪಡಿಸುತ್ತದೆ ಎಂದು ಇಸ್ರೋ ತಿಳಿಸಿದೆ.

ಇಸ್ರೋ ಪ್ರಕಾರ, POEM-4 ಬಾಹ್ಯಾಕಾಶ ರೊಬೊಟಿಕ್ಸ್, ಬೀಜಗಳ ಮೊಳಕೆಯೊಡೆಯುವಿಕೆ ಮತ್ತು ಸೂಕ್ಷ್ಮ ಗುರುತ್ವಾಕರ್ಷಣೆಯಲ್ಲಿ ಬ್ಯಾಕ್ಟೀರಿಯಾದ ಬೆಳವಣಿಗೆ, ಹಸಿರು ಪ್ರೊಪಲ್ಷನ್, ಪೈರೋ ಥ್ರಸ್ಟರ್‌ಗಳ ಲೇಸರ್ ಇಗ್ನಿಷನ್, ಹವ್ಯಾಸಿ ರೇಡಿಯೋ ಪ್ರಸರಣ ಮತ್ತು ಸುಧಾರಿತ ಸಂವೇದಕಗಳಲ್ಲಿ ಪ್ರಯೋಗಗಳನ್ನು ನಡೆಸಿತು. ಬಾಹ್ಯಾಕಾಶ ಸ್ಟಾರ್ಟ್ - ಅಪ್ ಬಾಹ್ಯಾಕಾಶದಲ್ಲಿ ಎಐ ಪ್ರಯೋಗಾಲಯದ ಭಾಗವಾಗಿ AI ಮಾದರಿಯ ಅಪ್‌ಲಿಂಕಿಂಗ್ ಮತ್ತು ಕಾರ್ಯಗತಗೊಳಿಸುವಿಕೆಯನ್ನು ಸಹ ಪರೀಕ್ಷಿಸಿತು.

POEM-4 ಏವಿಯಾನಿಕ್ಸ್ ವ್ಯವಸ್ಥೆಯು 'ಮೇಡ್-ಇನ್-ಇಂಡಿಯಾ' 32-ಬಿಟ್ ಪ್ರೊಸೆಸರ್, Vikram3201 ಅನ್ನು ಆಧರಿಸಿದ ಮಿಷನ್ ಮ್ಯಾನೇಜ್‌ಮೆಂಟ್ ಕಂಪ್ಯೂಟರ್ ಸಹ ಮೌಲ್ಯೀಕರಿಸಿತು. ಇದು ನ್ಯಾವಿಗೇಷನ್ ಸಿಸ್ಟಮ್‌ಗೆ ಸಹಾಯ ಮಾಡಲು ಮೊದಲ ಬಾರಿಗೆ ನ್ಯಾನೋ ಸ್ಟಾರ್ ಸೆನ್ಸಾರ್ ಜೊತೆಗೆ ಇಸ್ರೋ ಅಭಿವೃದ್ಧಿಪಡಿಸಿದ ಕಸ್ಟಮ್ ಆರ್ಕಿಟೆಕ್ಚರ್‌ ಸಹ ಬಳಸುತ್ತಿದೆ ಎಂದು ಇಸ್ರೋ ಹೇಳಿದೆ.

POEM-4 ಇದುವರೆಗಿನ ಎಲ್ಲ POEM ಕಾರ್ಯಾಚರಣೆಗಳಲ್ಲಿ ಅತಿ ಹೆಚ್ಚು ಪೇಲೋಡ್‌ಗಳನ್ನು ಹೊತ್ತೊಯ್ದಿದೆ. ವೈವಿಧ್ಯಮಯ ಪೇಲೋಡ್‌ಗಳಿಗೆ ವೆಚ್ಚ-ಪರಿಣಾಮಕಾರಿ ಪ್ರಾಯೋಗಿಕ ವೇದಿಕೆಯಾಗಿ ಅದರ ಬಹುಮುಖತೆಯನ್ನು ಪುನರುಚ್ಚರಿಸುತ್ತದೆ ಎಂದು ಇಸ್ರೋ ತನ್ನ ಹೇಳಿಕೆಯಲ್ಲಿ ತಿಳಿಸಿದೆ.